ಶನಿವಾರ, ಏಪ್ರಿಲ್ 15, 2017

ಸೊಪ್ಪಿನ ಮನೆಮದ್ದಿಗೆ ಹೆದರಿ ಮೆತ್ತಗಾದ ಅಂಗಾಲಿನ ಆಣೆ !

ಹಿಂದಿನ ವರ್ಷ ನನ್ನ ಅಂಗಾಲಲ್ಲಿ ಒಂದು 'ಆಣಿ' ಆಗಿತ್ತು. 'ಆಣಿ' ಅಂದರೆ ನಿಮಗೆ ಗೊತ್ತಿರಬಹುದು. ಮೊದಮೊದಲು ಒಂದು ಜಾಗದಲ್ಲಿ ಸಣ್ಣ ಮುಳ್ಳು ಚುಚ್ಚಿದಂತೆ ಅನ್ನಿಸುತ್ತದೆ. ಆಮೇಲೆ ಕ್ರಮೇಣ ಅಲ್ಲಿ ಚರ್ಮ ಗಟ್ಟಿಯಾಗುತ್ತಾ ಚರ್ಮದೊಳಗೇ ಸಣ್ಣ ಗಂಟಿನಂತಾಗುತ್ತದೆ. ಕಾಲು ನೆಲಕ್ಕೆ‌ ಊರಲಾಗದಷ್ಟು ನೋವು ಕೊಡುತ್ತದೆ. ಕೆಲವರಿಗೆ ಅದರಲ್ಲಿ‌ ನಡುವೆ ಒಂದು ಕಪ್ಪು ಚುಕ್ಕಿ ಮೂಡುತ್ತದೆ. ಕೆಲವರಿಗೆ ಅದರಿಂದ ಒಂದು ಕಾಳಿನಂತಹ ರಚನೆಯೂ ಹೊರಬರುತ್ತದೆ. ಅದಕ್ಕೆ 'ಮೀನಿನಕಣ್ಣು' ಅನ್ನುತ್ತಾರಂತೆ.
ಈಗ ನನ್ನ ಅಂಗಾಲಿನ ಆಣಿಯ ಕತೆ ಮುಂದುವರೆಸ್ತೇನೆ. ಮೊದಲು ಚುಚ್ಚಿದಂತಹ ನೋವು ಬಂದಾಗ ನಿರ್ಲಕ್ಷಿಸಿದ್ದೆ. ಆಮೇಲೆ ಸಣ್ಣ ಮುಳ್ಳು‌ ಇರಬಹುದು ಎಂದು ಒಮ್ಮೆ ಕೆದಕಿಯೂ ನೋಡಿ ಸಿಗದಿದ್ದಾಗ ಸುಮ್ಮನಾದೆ. ಆದರೆ ದಿನದಿಂದ ದಿನಕ್ಕೆ ಅದು ನಿಧಾನಕ್ಕೆ ಗಟ್ಟಿಯಾಗುತ್ತಾ ಹೋಗಿ ಎರಡ್ಮೂರು ತಿಂಗಳಾಗುವುದರೊಳಗಾಗಿ ಬರಿಗಾಲನ್ನು ನೆಲಕ್ಕೆ ಊರುವುದು ಕಷ್ಟವಾಯಿತು. ಆಮೇಲೆ ಇದಕ್ಕೆ‌ ಪರಿಹಾರ ಚಿಕಿತ್ಸೆ ಹುಡುಕುವ ಕೆಲಸ ಶುರುವಾಯಿತು. ಯಾಕೋ ಅಲೊಪತಿ ಡಾಕ್ಟರಲ್ಲಿ ಹೋಗಲು ಮನಸಾಗದೇ ಮನೆಮದ್ದಿನ ಸಲಹೆ‌ ಕೇಳಿದೆ. ನಮ್ಮ ಕಡೆ ಹಳ್ಳಿಯಲ್ಲಿ ಹಲವು ಸಲಹೆ ದೊರೆತವು.‌
೧. ಈರುಳ್ಳಿ slice ಸ್ವಲ್ಪ ಬಿಸಿಮಾಡಿ‌ ಅಂಗಾಲಿಗೆ ಕಟ್ಟಿಕೊಂಡು ರಾತ್ರಿ ಮಲಗುವುದು.
೨. ಕಡ್ಲೇಬೇಳೆಯನ್ನು ಬಾಯಲ್ಲಿ ಚೆನ್ನಾಗಿ ಅಗೆದು ಅದನ್ನು ಆಣಿಗೆ ಹಚ್ಚಿ‌ ಕಟ್ಟುವುದು.
೩. ಬೆಣಕು ಕಲ್ಲನ್ನು ಬಿಸಿಮಾಡಿ ಅದರ ಮೇಲೆ ತೆಂಗಿನ ಚಿಪ್ಪು ಮುಚ್ಚಿ ಅದರ ಮೇಲೆ ಅಂಗಾಲಿಟ್ಟು ಆಣಿಯನ್ನು ಮೆದುಮಾಡುವುದು.
೪. ಮೈಲುತುತ್ತವನ್ನು ಅನ್ನಬೇಯಿಸಿದ ನೀರಲ್ಲಿ‌ ತೇಯ್ದು ಹಚ್ಚುವುದು.
೫. ಹೊಳೆದಂಡೆಯ ನಯವಾದ ಕಲ್ಲನ್ನು ಅಥವಾ ಇಟ್ಟಿಗೆಯನ್ನು ಬಿಸಿಮಾಡಿ ಅದರ ಮೇಲೆ‌ ಕಾಲಿಡುವುದು.
೬. ಅಡಕೆಯಂತೆ ಇರುವ ಒಂದು ಆಯುರ್ವೇದ ಔಷದಿ ತೇಯ್ದು ಹಚ್ಚುವುದು.
ಇದರಲ್ಲಿ ೧,೨,೪,೬ - ಈ ನಾಲ್ಕು ಚಿಕಿತ್ಸೆಗಳನ್ನ ಹಲವು ದಿನಗಳವರೆಗೆ ಮಾಡಿದೆ. ಆದರೆ ಯಾವುದರಿಂದಲೂ ಗುಣವಾಗದೇ ಅಂಗಾಲೂರಿ ನಡೆಯಲಾರದ ಸ್ಥಿತಿಗೆ ಬಂದೆ.‌ ನಾಲ್ಕು ತಿಂಗಳು ಕಳೆದಿತ್ತು. ಕೊನೆಗೆ ಚರ್ಮದ ವೈದ್ಯರ ಬಳಿಯೇ ಹೋಗಬೇಕಾಯಿತು. ಅವರು corn plaster ಹಚ್ಚಲು ಸಲಹೆ ಕೊಟ್ಟರು. ಅದು band-aidನಂತದ್ದು. ಹಚ್ಚಿ ಮೂರುದಿನಗಳ ನಂತರ ತೆಗೆಯಬೇಕು. ಒಂದು ಆಣಿ‌ ಕೊಳೆಯಲು ಮೂರ್ನಾಲ್ಕು ಇಂತಾದ್ದು ಬೇಕಾಗುತ್ತದೆ ಎಂದರು. ಅವರ ಪ್ರಕಾರ ಅಂಗಾಲಿನ ಚರ್ಮ ಯಾವುದೋ ಕಾರಣಕ್ಕೆ ಸೂಕ್ಷ್ಮವಾಗಿ ತೆರೆದುಕೊಂಡಾಗ ಅದರಲ್ಲಿ ಬ್ಯಾಕ್ಟೀರಿಯಾಗಳು ಹೋಗಿ ಹೀಗಾಗ್ತದಂತೆ.
ಅಷ್ಟರಲ್ಲಿ ನನ್ನ ಆಣಿಯ ಸುದ್ದಿ ಕುಟುಂಬದಲ್ಲಿ ಹರಡಿತ್ತು. ಆಗ ಬಂತು ನಮ್ಮ ಚಿಕ್ಕಮ್ಮರ ನಾಟಿಔಷಧಿ ಸಲಹೆ. ಅದೇ ಈ ಚಿತ್ರದಲ್ಲಿರುವ ಸೊಪ್ಪು. ಇದನ್ನು ಈರುಳ್ಳಿಯೊಂದಿಗೆ ರುಬ್ಬಿ ಅಂಗಾಲಿಗೆ ಹಚ್ಚಿ ಕಟ್ಟಿ ರಾತ್ರಿಯಿಡೀ ಬಿಡಬೇಕು. ಹೀಗೆ ಕೆಲದಿನ ಮಾಡಿದರೆ ಗುಣವಾಗುವ ೯೯% ಭರವಸೆಯೂ ಸಿಕ್ಕಿತು. ಆದರೆ‌ ಆ ಸೊಪ್ಪಿಗೆ ಹೆಸರಿಲ್ಲ (ಹೆಸರು ಗೊತ್ತಿಲ್ಲ). ಅದನ್ನ ನೋಡಿ ಹುಡುಕಿಯೇ ಕಂಡುಹಿಡಿಯಬೇಕು. ಹಾಗಂತ ದುರ್ಲಭವೇನಲ್ಲ. ಅವರು ಹುಬ್ಬಳ್ಳಿಯಲ್ಲಿರುವುದರಿಂದ ಅವರ ಮನೆಯ ಬಳಿ ಪಾರ್ಕಿನಲ್ಲೇ ಇತ್ತಂತೆ.‌ ಕಿತ್ತು ಕಳಿಸಿಕೊಟ್ಟರು.
ಅನಂತರದ್ದೆಲ್ಲಾ ಮ್ಯಾಜಿಕ್. ಈ ಸೊಪ್ಪಿನೊಂದಿಗೆ ಈರುಳ್ಳಿ ರುಬ್ಬಿ ಆಣಿಗೆ ಹಚ್ಚಿ ಅದರಮೇಲೆ ಸಣ್ಣ ಬಾಳೆಎಲೆ ಇಟ್ಟು ಕಟ್ಟಿ ರಾತ್ರಿಯಿಡೀ ಬಿಟ್ಟೆ. ಶುರುಮಾಡಿದ ಎರಡನೇ ದಿನಕ್ಕೇ ಆಣಿಯ ನೋವು ಮಾಯ! ದಿನಬಿಟ್ಟು ದಿನ ಹಚ್ಚುತ್ತಿದ್ದೆ. ಒಂದು ವಾರದೊಳಗಾಗಿ ಆಣಿ ಮೆತ್ತಗಾಗಿಹೋಯಿತು. ಮತ್ತೊಂದು ವಾರದಲ್ಲಿ ಹೇಳಹೆಸರಿಲ್ಲದೇ ಮಾಯವಾಯಿತು!


***
ಈ ಅನುಭವವನ್ನು ಫೇಸ್ಬುಕ್ಕಿನ 'ಕಾಜಾಣ' ಗುಂಪಿನಲ್ಲಿ ಹಂಚಿಕೊಂಡಾಗ ಅದಕ್ಕೆ ಬಂದ ಉಪಯುಕ್ತ ಪ್ರತಿಕ್ರಿಯೆಗಳನ್ನು ಈ ಕೆಳಗೆ ಸಂಗ್ರಹಿಸಿದ್ದೇನೆ.
ನಮ್ಮ ಕಡೆ ಇದನ್ನ ಅಡಿಕೆ ಸೊಪ್ಪು ಅಂತಾನೆ ಕರೆಯುತ್ತಾರೆ. ಗಾಯಗಳಾದಾಗ ರುಬ್ಬಿ ಅಥವಾ ಕೈನಲ್ಲಿ ಮಸೆದು ಅದರ ರಸವನ್ನು ಹಿಂಡುತ್ತಿದ್ದರು.:) - Vanaja Mahesh 

ನಾನು ಇದನ್ನು ಮೊದಲು ನೋಡಿದ್ದು ಶಿವಗಂಗೆಯಲ್ಲಿ . ಚೇಳಿನ ಸೊಪ್ಪು ಅಂತ ಕರೆಯುತ್ತಿದ್ದರು. ವಿಷದ ಚೇಳು ಕಚ್ಚಿದಾಗ ಇದನ್ನು ಬೆಲ್ಲದ ಜೊತೆ ತಿನ್ನಿಸಿದರೆ ವಿಷದ ಪರಿಣಾಮ ಕಡಿಮೆ ಆಗುತ್ತದೆ. ಚೇಳು ಕಡಿದ ಜಾಗಕ್ಕೂ ಅದರ ರಸ ಸವರುತ್ತಾರೆ. ಬೆಂಗಳೂರಲ್ಲೂ ಕಳೆಯಂತೆ ಪಾರ್ಕ್ಗಳಲ್ಲಿ, ಚರಂಡಿ ಬದಿಯಲ್ಲಿ ಬೆಳೆದಿದ್ದು ನೋಡಿದ್ದೇನೆ. - Rajesh Srivatsa

ಗೊಂಡೇ(ಹಾರ) ಸೊಪ್ಪು.....
ಎಲ್ಲಾ ತರಹದ ಗಾಯಕ್ಕೆ ಪ್ರಥಮ ಔಷದ - S D Sathyananda Udupa

ನೀವು ಕೊಟ್ಟಿರುವ ಚಿತ್ರದಲ್ಲಿರುವ ಸೊಪ್ಪನ್ನು ನಮ್ಮ ಊರಿನಲ್ಲಿ (ಬಳ್ಳಾರಿ ಜಿಲ್ಲೆಯ ಕೂಡ್ಲಿಗಿ) ಗೆಜ್ಜಡಿಕೆ ತಪ್ಲು ಅನ್ನುತ್ತಾರೆ. ಇದರ ಸಸ್ಯಶಾಸ್ತ್ರೀಯ ಹೆಸರು - Tridax procumbens. ಇದರ ಹೂವನ್ನು ದಂಟಿನ ಸಮೇತ ಹಿಡಿದುಕೊಂಡು ನಮ್ಮ ಕಡೆ ಚಿಕ್ಕ ಮಕ್ಕಳು ಆಟವಾಡುತ್ತಿದ್ದರು. ಅವರು "ತಾತಾ.. ತಾತಾ.. ಒಂದ್ರುಪಾಯಿ ಕೊಡು ಇಲ್ದಿದ್ರೆ ನಿನ್ನ ತಲೆಕಾಯ್ ಎಗ್ರಿಸ್ತೀನಿ" ಎಂದು ಈ ಹೂವಿನ ತಲೆಯನ್ನು ಎಗುರಿಸುತ್ತಿದ್ದರು.- Sridhar Bandri 

ಇತರೇ ಕಾಜಾಣಿಗರು ಅಭಿಪ್ರಾಯ ಪಟ್ಟಂತೆ ಅದರ ಹೆಸರು ಅಡಿಕೆ ಸೊಪ್ಪು, ಚೇಳಿನ ಸೊಪ್ಪು, ಸೇವಂತಿಗೆ ಸೊಪ್ಪು ಅಂತಲೂ ಪ್ರಾದೇಶಿಕವಾಗಿ ಕರೆಯಬಹುದು. ಅದಕ್ಕೇ ಅದರ ಸಸ್ಯಶಾಸ್ತ್ರೀಯ ಹೆಸರನ್ನು ಕೊಟ್ಟದ್ದು. ನೀವು ನಾನು ಕೊಟ್ಟಿರುವ ಚಿತ್ರವನ್ನು ನೋಡಿ ತಾಳೆ ಮಾಡಿಕೊಳ್ಳಿ. ಒಟ್ಟಾರೆಯಾಗಿ ಇದರಿಂದ ಆಣಿಯನ್ನು ನಯ ಮಾಡಬಹುದು ಎನ್ನುವುದು ಸಂತೋಷಕರ ಸಂಗತಿ. ಈ ಸೊಪ್ಪು ಬಹಳಷ್ಟು ಕಡೆ ಕಳೆ ಗಿಡದಂತೆ ಬೆಳೆಯುತ್ತದೆ!-Sridhar Bandri 

ನಮ್ಮ ಮಾವನವರು ಕಾಮಾಲೆಯಾದವರಿಗೆ ಈ ಗಿಡದ ರಸದ ಜೊತೆಗೆ ತುಳಸಿ ರಸವನ್ನು ಸೇರಿಸಿ ಔಷಧಿಯಾಗಿ ಕೊಡುತ್ತಿದ್ದರಂತೆ. ಈ ಗಿಡಕ್ಕೆ ತೊಂಡೆಸೊಪ್ಪು ಎನ್ನುತ್ತಾರೆ ಎಂದು ನನ್ನ ಪತಿ ಈಗಷ್ಟೆ ತಿಳಿಸಿದರು-Padma Venkatesh 

ಹೌದು! ನಾವೂ ಚಿಕ್ಕಂದಿನಲ್ಲಿ ಬಿದ್ದು ರಕ್ತ ಒಸರಿದರೆ ತಕ್ಷಣವೇ ಅಲ್ಲೇ ಅಕ್ಕಪಕ್ಕದಲ್ಲಿ ಧಂಡಿಯಾಗಿ ಬಿಟ್ಟಿರುತ್ತಿದ್ದ ಈ ಸೊಪ್ಪಿನರಸವನ್ನು ಕೈಯಲ್ಲೇ ಉಜ್ಜಿ ನೇರ ಗಾಯಕ್ಕೇ ಹಾಕುತ್ತಿದ್ದೆವು. ಇದರ ಹೂವಿನ ಹಾರ ಮಾಡುವುದಂತೂ ಅತಿ ಪ್ರಿಯವಾದ ಕಾರ್ಯಗಳಲ್ಲೊಂದಾಗಿತ್ತು! ಅಲ್ಲದೆ ಅದರ ಹೂವನ್ನು ಚಟ್ಟೆಂದು ಎಗರಿಸುವುದೂ ಸಹ ಆಟವಾಗಿತ್ತು. :) ಬಾಲ್ಯದ ನೆನಪುಗಳು..-ಮಾಲಾ ಹೊ ನಾ 

ಈ ಸೊಪ್ಪು ನಮ್ಮ ಹೊಲದ ತುಂಬೆಲ್ಲಾ ಇದೆ. ಕಳೆದ ವರ್ಷ ನನ್ನ ಮಗನಿಗೂ ಆಣಿ ಆಗಿತ್ತು, ಅಮ್ಮ ಸೊಪ್ಪಿನ ಜೊತೆ ಈರುಳ್ಳಿ ಮಿಶ್ರಣದ ಔಷಧಿ ಮಾಡಿದ್ರು ...ಎರಡೇ ದಿನದಲ್ಲಿ ಮಾಯವಾಗಿತ್ತು.-ಸುಗುಣಾ ಮಹೇಶ್ 

 ಬಾಲ್ಯ ಕಾಲದಲ್ಲಿ ಕಾಲಿನಲ್ಲಿ ಆಣಿ ಆದ್ರೆ ಸೂಜಿ-ನೂಲಿಂದ ಆ ಆಣಿಯ ಸುತ್ತ ಒಂದು ಹೊಲಿಗೆ ಹಾಕ್ತಾ ಇದ್ವಿ... ಆಣಿ ಮಾಯ ಆಗ್ತಿತ್ತು...ಈ ಗಿಡ ಸಿಗಬಹುದಾ ಅಂಥ ಮನೆ ಪಕ್ಕದ ಖಾಲಿ ಸೈಟಲ್ಲಿ ಹುಡುಕ್ತಾ ಇದ್ದೀನಿ... ಮನೆ ಹತ್ರ ಒಬ್ಬರು ತುಂಬಾ ವರ್ಷದಿಂದ ಆಣಿ ಆಗಿ ಒದ್ದಾಡ್ತಾ ಇದ್ದಾರೆ. ಸಿಕ್ಕರೆ ಅವರಿಗೆ ತಕ್ಕೊಂಡು ಹೋಗಿ ಕೊಡಬಹುದಲ್ಲ ಅಂಥ ...ಸುರೇಖಾ ಭೀಮಗುಳಿ

 ಇದು ಗೊಂಡೇಸೊಪ್ಪು...ರಾಮಬಾಣದಂತಹ ಮದ್ದು...
ಬಾಲ್ಯದಲ್ಲಿ ರಕ್ತಸುರಿವ, ತರಚಿದ ನಮ್ಮ ಮಂಡಿ ತುಂಬ ಮೆತ್ತಿ ಮೆತ್ತಿ ಒತ್ತಿದ ಅದ್ಭುತ ಸೊಪ್ಪಿದು.
ನಮ್ಮ ನಂ. ಒನ್ ಡಾಕ್ಟರ್ ಇವರೇ :) ಆಗ..

ಆಣಿಗೂ ಇದು ಮದ್ದು ಅಂತ ಗೊತ್ತಾಗಿದ್ದು ಇವತ್ತೇ..
ಧನ್ಯವಾದಗಳು...ಮಾಹಿತಿಗೆ.-Kapila Sridhar

ಅಯ್ಯೋ ಟಿಕ್ಕಿ ತೊಪ್ಪಲ.. ನಮ್ಮ ಕಡೆ ಎಲ್ಲಾ ಗಾಯಗಳಿಗೆ ಏಕಮಾತ್ರ ಔಷಧ.. ಕಳ್ಳನ ರುಂಡ ಹಾರಿಸುತ್ತಿದ್ದೆವು.. ಈ ಹೂವನ್ನು ಕೈಲಿ ಹಿಡಿದು-Deepa Joshi 

ರೊಕ್ಕಾ ಕೊಡ್ತೀಯೋ ಇಲ್ಲಾ ರುಂಡಾ ಹಾರಿಸ್ಲೋ' ಅನ್ನೋ ಆಟಾ ಆಡ್ತಿದ್ದ ನೆನಪು ಬಂತು ಈ ಔಷಧೀಯ ಗುಣವುಳ್ಳ ಟಿಕ್ಕಿ ಸೊಪ್ಪನ್ನ ನೋಡಿ. ..ಚಿಕ್ಕವಳಿದ್ದಾಗ ಹಳ್ಳಿಯ ಮಕ್ಕಳೊಡನೆ ಆಡೋವಾಗ ಈ ಸೊಪ್ಪಿನ ಪರಿಚಯವಾಗಿತ್ತು. ಅವ್ರು ಇದನ್ನ ಚೆನ್ನಾಗಿ ಜಜ್ಜಿ ಗಾಯದ ಮೇಲೆ ರಸ ಹಿಂಡ್ತಾ ಇದ್ರು.. ಆಬ್ಬಾ..ಅದೇನು ಉರಿ ಅಂತೀರಾ. ಇದಕ್ಕೆ ಆನೆಯನ್ನೂ ಗುಣಪಡಿಸೋ ಗುಣವಿದೆ ಅಂತ ತಿಳಿಸಿದ್ದಕ್ಕೆ ನಿಮಗೂ ಮತ್ತು ನಿಮ್ಮ ಚಿಕ್ಕಮ್ಮನಿಗೂ ಧನ್ಯವಾದಗಳು.-Savita Inamdar 

7 ಕಾಮೆಂಟ್‌ಗಳು:

sunaath ಹೇಳಿದರು...

ಉಪಯುಕ್ತ ಮಾಹಿತಿಗಾಗಿ ಧನ್ಯವಾದಗಳು, ವಿಕಾಸ.

ಜ್ಯೋತಿ ಹೇಳಿದರು...

Useful information

Mahesh Hegade ಹೇಳಿದರು...

Good info. I knew these leaves are used for general wounds. But did not this specific use.

What is the English term for 'ಆಣಿ'?

Came across two terms 'corn' 'callus'. https://en.wikipedia.org/wiki/Callus

Looks like yours was a specific case of callus. If exact English term is known, I want to do little more research. :)

ವಿ.ರಾ.ಹೆ. ಹೇಳಿದರು...

@Sunatha Kaka, @Jyothi, Thanks

@Maheshanna, Yes... it is 'Callus'

Harisha Gurappa ಹೇಳಿದರು...

ವಿಕಾಸ್, ತುಂಬಾ ಉಪಯುಕ್ತ ಬರಹ. ಬೆಂಗಳೂರು ಸಿಟಿಯಲ್ಲಿ ಬೆಳೆದ ನಾನು ೮೦ರಲ್ಲಿ ನನಗೆ ಗೊತ್ತಿಲ್ದೇನೆ ಈ ಬೀದಿ ಬದಿಯಲ್ಲಿ ಬೆಳೆದಿರುತ್ತಿದ್ದ ಈ ಗಿಡದ ಹೂವನ್ನು ತಲೆ ಎಗರಿಸುವ ಆಟ ಆಡಲು ಬಳಸುತ್ತಿದ್ದೆ. ಒಳ್ಳೆಯ ಬರಹಕ್ಕಾಗಿ ಧನ್ಯವಾದಗಳು

ಅನಾಮಧೇಯ ಹೇಳಿದರು...

ತುಂಬಾ ಉಪಯುಕ್ತ ಮಾಹಿತಿ. ಧನ್ಯವಾದಗಳು. ನನಗೂ "ಮೀನಿನ ಕಣ್ಣು' ಆಗಿದೆ. ಬೆಂಗಳೂರಿನಲ್ಲಿ ಇದು ಎಲ್ಲಿ ಕಾಣಸಿಗುತ್ತದೆ ಎಂದು ದಯವಿಟ್ಟು ತಿಳಿಸಿ.

ವಿ.ರಾ.ಹೆ. ಹೇಳಿದರು...

@Harish Gurappa, Thank you.